បាត់ដំបង៖ សមត្ថកិច្ចបានចុះបង្រ្កាបបទល្មើសនេសាទខុសច្បាប់មួយលើកនៅចំណុចបឹងទន្លេសាប ស្រុកឯកភ្នំ ខេត្តបាត់ដំបង នាថ្ងៃទី២៨ ខែធ្នូ ឆ្នាំ២០២២។ អំឡុងអាជ្ញាធរចុះទៅដល់ទីតាំង អាជ្ញាធរបានត្រឹមតែដកហូតឧបករណ៍នេសាទខុសច្បាប់ ប៉ុន្តែជនល្មើសហាក់បីដូចជាដឹងមុន បានរត់គេចខ្លួនមុនពេលសមត្ថកិច្ចចុះទៅដល់។
សមត្ថកិច្ចបានដកហូតបានសាច់មងប្រវែង ៤១០០ម៉ែត្រ ឡុកសម្រាប់ត្រីចំនួន ១១គ្រឿង និងបង្គោលចំនួន ៣០០ដើម។ វត្ថុតាងទាំងអស់នោះ សមត្ថកិច្ចកាប់បំផ្លាញ និងដុតកម្ទេចចោលនៅនឹងកន្លែងតែម្តង។
ជាមួយគ្នានេះសមត្ថកិច្ចក៏បានលែងត្រីចំរុះចំនួន ២៥០គីឡូក្រាមទៅក្នុងបឹងទន្លេសាបវិញ។ ដោយឡែកជនល្មើស សមត្ថកិច្ចកំពុងតែស្រាវជ្រាវ និងតាមចាប់៕
